Waziri wa Nchi katika Ofisi ya Rais anayeshughulikia Menejimenti ya Utumishi wa Umma na Utawala Bora, Mhe. Ridhiwani Kikwete, ameihimiza Menejimenti ya Sekretarieti ya Ajira kuharakisha hatua zote za ajira mpya 12,000 zilizotangazwa na Rais wa Jamhuri ya Muungano wa Tanzania, Mhe. Dkt. Samia Suluhu Hassan, wakati wa ufunguzi rasmi wa Bunge la 13 mnamo tarehe 14 Novemba 2025 jijini Dodoma.
Ametoa maagizo hayo tarehe 24 Novemba 2025 katika ziara yake ya kwanza kwenye taasisi hiyo tangu alipoteuliwa na Rais Samia kuwa Waziri wa Nchi, Ofisi ya Rais, Menejimenti ya Utumishi wa Umma na Utawala Bora, tarehe 18 Novemba 2025.
Amesisitiza kuwa moja ya malengo makuu ya Rais Samia ni kuboresha utendaji wa Utumishi wa Umma ili huduma kwa wananchi ziimarike. Kwa msingi huo, Rais aliahidi vibali vya ajira 12,000, ikiwemo nafasi 7,000 za Kada ya Elimu na nafasi 5,000 za Kada ya Afya.
“Kibali kipo, na ninawashukuru kwa kuanza utekelezaji. Ni matarajio yangu kuwa maelekezo ya Mhe. Rais yataonekana hivi karibuni. Hakikisheni hatua zote zinazohusu ajira hizi zinafanyika kwa uwazi ili kuondoa dhana ya upendeleo,” Mhe. Kikwete ameeleza.
Aidha, ameitaka Menejimenti kuongeza juhudi ili kushughulikia changamoto zinazochelewesha mchakato wa ajira, na kuhakikisha kuwa kila hatua inakwenda kwa ufanisi na ndani ya muda unaotakiwa.
Amesema pia kwamba maadili ya utumishi yazingatiwe ili kupata wataalam wenye uwezo na sifa stahiki kwa ajili ya kulitumikia taifa. Amewakumbusha viongozi kutojenga mazingira ya kuwaonea watumishi bali kuwasaidia na kuwaongoza kwa weledi.
Naibu Waziri, Mhe. Regina Qwaray, ameomba ushirikiano kutoka kwa Menejimenti hiyo, akisisitiza umuhimu wa kufanya kazi kwa pamoja katika kutatua changamoto za wananchi kama ilivyo nia ya Rais Samia.
Kwa upande wake, Katibu wa Sekretarieti ya Ajira, Bwana Mick Kiliba, ameishukuru uongozi kwa kufanya ziara hiyo na kuonesha kujali majukumu ya taasisi. Ameahidi kuwa mchakato wa ajira 12,000 utakamilishwa ndani ya muda uliopangwa.
Soma pia:
